che-guevara "احمد فؤاد نجم"

صرخة جيفارا
جيفارا مات
جيفارا مات
اخر خبر فى الراديوهات
وفى الكنايس والجوامع
وفى الحواري والشوارع
وع القهاوي وع البارات
جيفارا مات
واتمد حبل الدردشه
والتعليقات
مات المناضل المثال
ياميت خسارة على الرجال
مات الجدع فوق مدفعة جوه الغابات
جسد نضالة بمصرعه ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين فى المأكولات
والملبوسات
يا دافيانين ومولعين الدفايات
يا محفلطين يا ملمعين
ياجيمسنات
يا بتوع نضال اخر زمن
فى العوامات
ما رايكم دام عزكم
جيفارا مات
لاطنطنة
ولا شنشنه
ولا اعلامات واستعلامات
**عينى عليه ساعه القضا
من غير رفاقه تودعه
يطلع انينه للفضا
يزعق ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمه وادع
لجل الجياع
يمكن وصيه
للى حاضنين القضيه
فى الصراع
صور كتير ملو الخيال
والف مليون احتمال
لكن اكيد
اكيد
اكيد
ولاجدال
جيفارا مات
موتة رجال
ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او جبان
صرخه جيفار
يا عبيد
في اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص


2 Comments:
At October 14, 2007 at 12:09 AM ,
tota said...
القاهرة 1968
القصيدة للشاعر أحمد فؤاد نجم وهى شعر بالعامية
انا عارفة ان معظمنا ما يعرفش مين هو جيفارا اصلا لكنه كان من اقوى الناس اللى حاربت النظام الامريكى بكل قوة لحد ما اغتالوه بكل خسة كعادتهم
At November 26, 2008 at 5:54 PM ,
Sameh Ragheb said...
ana aslan kont 3ayez akteb, enaha kaseedet Ahmed Fouad Negm, kwayes enek katba men nafsek
leah bas el nas mate3rafsh Givara, dah 7atta konna fe sertoh embare7 ana wes7aby
Post a Comment
Subscribe to Post Comments [Atom]
<< Home